Cada ano, desde fai milleiros de anos, pobos de África, América, Europa, Asia e Oceanía achéganse a contemplar o nacemento como quen contempla toda a creación.
É certo que despois viñeron as “festas” de Nadal, os agasallos, o papa Noel de Coca cola, as luces nas rúas, as rebaixas e os Tío Vivos. Pero iso é outra historia, que pouco ten que ver co Nadal.
O que o mundo celebra en Nadal é o nacemento no pesebre. Sen Belén, non hai Nadal.
Poñer o Belén no centro da cidade, na Praza do Obradoiro que é lugar de acollida, é un símbolo de paz e de amor. Iso será o que faremos. O día xoves 22 de decembro ás 12h poñerase o Belén na Praza do Obradoiro en Santiago de Compostela.
Isto foi iniciativa do Movemento Cultural Cristián co apoio das Parroquias de Santiago de Compostela, Teo, a capela do CHUS, o Seminario, varias asociacións, comercios e 800 sinaturas que se recolleron espontáneamente en poucos días.
O Belén que poñeremos está realizado con materiais de refugallo para simbolizar o que se anunciou no Salmo: “A pedra que desbotaron os canteiros convértese en pedra angular”
Desexámosvos a todos un Bo Nadal, que sirva ao Amor, á Solidariedade, á Xustiza e á Paz.
XOVES 22 DE DECEMBRO
12H. COLOCAREMOS O BELÉN NO OBRADOIRO.
BREVES PALABRAS.
PANXOLIÑAS.
Nadal 2016